Über uns

Vor e paar Joor, gnau gno, im Joor 1997 sin die zwei Astrids vier Wuche vor dr Fasnacht uf d Idee ko, Piccolo spielend durch d Basler Gasse z schwäbe. S het genau für vier Märsch glängt, die aber wirklig zweistimmig. Voller Vorfreud sin die beide am Heubärg igstande und hän uf die vier wichtige Gloggeschläg gwartet. S het agfange und me het sich fascht vrlore. Die ganzi Fasnacht het me sich e Wääg durch die Masse miesse sueche. Suscht isch es sehr luschtig gsi und mir hän uns fir s nächschte Joor einiges vorgno, vor allem hän mir e patente Vortraab welle sueche.

Dä hän mir bald gfunde und d Miri isch zue uns gstoose. Mir hän e Name für unser Grüppli gsuecht und hän uns vom Dolce Vita loh astecke. D Italinata het unserem Grüppli dr Name gäh und sithär mache mir als Le Befane (Häxe) d Stroose vo Basel unsicher. Unser Grüppli isch stetig gwachse und es sin au männligi Häxe drzue ko. Mir freue uns allewyl uf d Fasnacht und streife als wildi Gruppierig durch d Basler Gasse. Dr Cortège lön mir us. Mir ritte lieber uf unser eigene Fasnachtswälle ohni Vorschrifte und Regle.